အဏုစိတ်ရိုးဆက်ချပ်ပြားဝိုင်းခွဲစိတ်ခြင်း အား မှိန်းစေသည့်ဆေးထိုးပြီး ထုံဆေးဖြင့်ခွဲစိတ်ပါသည်။ ထို့ကြောင့် ခွဲစိတ်နေစဉ် သင်အသိရှိနေပါမည်။ မေ့ဆေးသုံးရသည်လည်း ရှိနိုင်ပါသည်။ သေးငယ်သောခွဲစိတ်ရာ (၂ လက်မခန့်) လေးအား နောက်ကျောဘက်မှ ခါးရိုးဆစ်များအကြား ပြုလုပ်ပါသည်။ ထို့နောက် ခွဲစိတ်ဆရာဝန်သည် ခါးကြွက်သားများအား ဘေးသို့ဖယ်ပါသည်။ ခွဲစိတ်ကိရိယာများတပ်ဆင်ထားသည့် ကွေးနိုင်၊ ဆန့်နိုင်သော မြင်အားကောင်းမှန်ပြောင်းလေးအား ကျွံနေသောရိုးဆက်ချပ်ပြားဝိုင်းအစများကိုဖယ်ရှားရာတွင် ဆရာဝန်အားလမ်းညွှန်နိုင်ရန် အသုံးပြုပြီး ခါးရိုးခွဲစိတ်မှုပြုလုပ်ပါသည်။

အဏုစိတ်ရိုးဆက်ချပ်ပြားဝိုင်းခွဲစိတ်ခြင်း အား ကျွံထွက်နေသောချပ်ပြားဝိုင်းမှ အာရုံကြောကိုဖိမိနေသဖြင့် ခြေထောက်နာကျင်ခြင်း သို့မဟုတ် အားနည်းခြင်းတို့အတွက်ကုသရန် အသုံးပြုပါသည်။

ယခုကဲ့သို့ ခါးရိုးခွဲစိတ်ခြင်းမှရသော နောက်ဆက်တွဲပြဿနာများသည် အဖြစ်နည်းပြီး မဆိုသလောက်သာဖြစ်တတ်ပါသည်။ သို့သော် မည်သည့်ခါးရိုးခွဲစိတ်မှုမျိုးတွင်မဆို အောက်ပါတို့အပါအဝင် အခြားအန္တရာယ်များရှိတတ်ပါသည်။

• အာရုံကြောအရင်းပိုင်းထိခိုက်ပြီး ခြေထောက်ထုံကျင်ခြင်း သို့မဟုတ် အားနည်းခြင်း
• အာရုံကြောများနှင့် အာရုံကြောမကြီးတို့၏အပေါ်မှအုပ်ထားသောအလွှာ ထိခိုက်ပျက်စီးခြင်း
• ခွဲစိတ်ထားသော ရိုးဆက်ချပ်ပြားဝိုင်းပြန်ကျွံခြင်း
• ခွဲစိတ်ပြီး နာကျင်မှုကျန်ခြင်း သို့မဟုတ် ပိုဆိုးလာခြင်း
• ထုံဆေး၊ မေ့ဆေးမတည့်ခြင်း

ခါးခွဲစိတ်မှုမတိုင်မီနှင့်ခွဲပြီးနောက် ဆရာဝန်မှပေးသောညွှန်ကြားချက်များအား လိုက်နာခြင်းဖြင့် ခွဲစိတ်မှုကြောင့်ရလာနိုင်သည့် အန္တရာယ်များကို လျော့နည်းစေနိုင်ပါသည်။

ခွဲစိတ်ဆရာဝန်အနေဖြင့် အဏုစိတ်ရိုးဆက်ချပ်ပြားဝိုင်းခွဲစိတ်ခြင်းအပြင် အခြားကုသနည်းများဖြစ်သည့် ကိုယ်အလေးချိန်ချခြင်း၊ နာကျင်မှုသက်သာစေသောဆေးများပေးခြင်း၊ ခါးဆေးထိုးခြင်း၊ လေ့ကျင့်ခန်းလုပ်ခြင်းတို့အား ပြောပြပါမည်။ အခြားခွဲစိတ်နည်းလမ်းများလည်း ပြောပြနိုင်ပါသည်။

အဏုစိတ်ရိုးဆက်ချပ်ပြားဝိုင်းခွဲစိတ်ခြင်းအတွက် သင့်တော်သောလူနာများမှာ ရိုးဆက်ချပ်ပြားဝိုင်းကျွံနေပြီး ခါးရိုးရှိအာရုံကြောများအား အနှောင့်အယှက်ဖြစ်နေသောသူများဖြစ်ပါသည်။ စမ်းသပ်စစ်ဆေးမှုနှင့် ဆွေးနွေးတိုင်ပင်မှုများလုပ်ပြီးပါက ခွဲစိတ်ဆရာဝန်အနေဖြင့် ခွဲစိတ်ရန်သင့်တော်၊ မသင့်တော်ကို ဆုံးဖြတ်ပေးပါလိမ့်မည်။