ကျောရိုးဆစ်တွယ်ဆက်ခြင်း အား ခါးအောက်ပိုင်းအရိုးဆစ်များတွင် ပြုလုပ်လေ့ရှိသည်။ သို့သော် လည်ပင်းနှင့် ကျောဘက်ပိုင်းအရိုးဆစ်များအား ကုသရာတွင်လည်း သုံးပါသည်။ ကျောရိုးဆစ်တွယ်ဆက်ရန်လိုအပ်သောလူနာများသည် အာရုံကြောဆိုင်ရာလက္ခဏာများ သို့မဟုတ် အလွန်အမင်းနာကျင်နေပြီး မခွဲရသောနည်းလမ်းများဖြင့် ကုသ၍မပျောက်သောသူများဖြစ်သည်။ 

အောက်ပါအခြေအနေများတွင် ကျောရိုးဆစ်တွယ်ဆက်ခြင်းလိုနိုင်ပါသည်။

• ရိုးဆက်ချပ်ပြားဝိုင်းပျက်စီးခြင်းရောဂါ
• ရိုးဆက်ချပ်ပြားဝိုင်းပျက်စီးခြင်းမှလာသောနာကျင်မှု
• ကျောရိုးအကျိတ်
• ကျောရိုးကျိုးခြင်း
• ခါးစောင်းခြင်း
• ခါးကုန်းခြင်း
• ခါးဆစ်ရှေ့သို့ချော်ထွက်ခြင်း
• ကျည်းပေါင်းတက်ခြင်း
• အခြား အသက်အရွယ်ရ၍ ပျက်စီးတတ်သောအခြေအနေများ
• ကျောရိုးမတည်ငြိမ်ခြင်းဖြစ်စေသည့် မည်သည့်အခြေအနေမဆို

များသောအားဖြင့် ခိုင်မြဲအောင်ပြုလုပ်ခြင်းဟုခေါ်သောနည်းလမ်းဖြင့် အရိုးဆစ်တွယ်ဆက်ခြင်း ပြုလုပ်ပါသည်။ ဆိုလိုသည်မှာ သတ္တုဝက်အူများ (တိုက်တေနီယမ်ဖြင့်ပြုလုပ်ထားသော)၊ ဝက်အူဆက်အတံ သို့မဟုတ် ပလိတ်ပြားများ၊ သို့မဟုတ် အရိုးဆစ်နှစ်ခုကြားထည့်သည့် အစားထိုးပစ္စည်းတို့ဖြင့် အရိုးဆစ်များဆက်ခြင်းကိုအားပေးရန် မလှုပ်အောင်ပြုလုပ်ခြင်းဖြစ်သည်။ အရိုးဆစ်ဆက်ခြင်းသည် ခွဲစိတ်ပြီးနောက် ၆-၁၂ လအတွင်းဖြစ်လေ့ရှိသည်။ အဆိုပါအချိန်အတွင်း အပြင်ဖက်မှ ခါးပတ်ကဲ့သို့သောအထိန်းပစ္စည်းများလိုအပ်သည်။ ဆေးလိပ်သောက်ခြင်း၊ အရိုးပွသည့်ရောဂါရှိခြင်း၊ အချို့ဆေးဝါးများသုံးစွဲခြင်းနှင့် အပြင်းအထန်လှုပ်ရှားမှုပြုခြင်းတို့သည် အရိုးဆက်ခြင်းကိုနှောင့်နှေးစေရုံသာမက မဆက်တော့ခြင်းပင် ဖြစ်စေတတ်သည်။ မဆက်ပါက ထပ်မံခွဲစိတ်ရန်လိုအပ်ပါမည်။

အာရုံကြောမကြီးအားထိခိုက်မိခြင်းမှာ အလွန်နည်းပါသည်၊ ခွဲစိတ်သူများ၏ ၁% လောက်တွင်သာ ဖြစ်တတ်ပါသည်။ သို့သော် မည်သည့်ခါးရိုးခွဲစိတ်မှုမျိုးတွင်မဆို အောက်ပါတို့အပါအဝင် အခြားအန္တရာယ်များရှိတတ်ပါသည်။

• ခွဲစိတ်ပြီးနောက် သွေးထွက်ခြင်း
• ပိုးဝင်ပြီး ပိုးသတ်ဆေးများလိုအပ်ခြင်း
• ထည့်သည့်ပစ္စည်းပြဿနာ - ခွဲပြီးနောက် ထည့်သည့်ပစ္စည်းများချောင်လာခြင်း
• သွေးခဲဖြစ်ပေါ်ခြင်း
• မေ့ဆေးအန္တရာယ်များ

ကိုယ်အလေးချိန်ချခြင်းနှင့် အနာသက်သာစေရန်ဆေးသောက်ခြင်းစသည့် မခွဲစိတ်ပဲပြုလုပ်နိုင်သည့်နည်းများကို ခွဲစိတ်ဆရာဝန်မှ ရှင်းလင်းပြပါမည်။ ကာယလေ့ကျင့်ခန်းပြုလုပ်ခြင်း သို့မဟုတ် ခါးပတ်ကဲ့သို့အထိန်းပစ္စည်းများသုံးခြင်းသည်လည်း ထိုးထွင်းဝင်ရောက်မှုမရှိသောနည်း (မခွဲစိတ်ရသောနည်း) ဖြင့် ကျောရိုးငြိမ်အောင်ပြုလုပ်ခြင်းအား အထောက်အကူပြုပါသည်။

ခွဲစိတ်ပြီးနောက် အချို့သူများတွင် ခါးနာခြင်းခံစားရတတ်ပြီး ခါးပတ်ကဲ့သို့အထိန်းပစ္စည်းသုံးရပါမည်။ သက်ကြီးပိုင်းများတွင် ခွဲစိတ်ရချိန်ပိုကြာတတ်ပြီး ကလေးများထက် နာလန်ထရန်လည်း ပိုကြာတတ်သည်။

လူနာအားစမ်းသပ်ဆွေးနွေးပြီးသောအခါ ဤခါးခွဲခြင်းအတွက် သင့်တော်၊ မသင့်တော်ကို ဆရာဝန်မှ ဆုံးဖြတ်ချက်ချပေးပါလိမ့်မည်။